Нарăс уйăхĕн  21- мĕшĕнче  тĕнчери халăхсем тăван чĕлхе кунне паллӑ тӑваҁҫӗ.   Сĕнтĕрпуçӗнчи  пĕтĕмĕшле пĕлÿ паракан шкулта та 2017 ҫулхи нарăс уйăхĕн  21- мĕшĕнче  чăваш чĕлхине халалланă "Тăван чĕлхепе калаç" анлă фестиваль иртрĕ.
          Уява Чăваш Республикин Вĕренÿпе çамрăксен политикин министрĕ Юрий Исаев, Культура, национальнăçсен ĕçĕсен тата архив ĕçĕн министерствин этноконфенси пай пуçлăхĕ Лидия Филиппова, тĕнче чемпионки, Чăваш Патшалăх Канашĕн депутачĕ Елена Николаева, ЧНК президиумĕн пайташĕ Эдуард Бахмисов, Сĕнтĕрвăрри район администрацийĕн пуçлăхĕ Анатолий Мясников, вĕренÿпе çамрăксен политикин  ертӳҁи С.Арсентьева, паллă поэтсем Раиса Сарпипе Альбина Юрату, «Сĕнтĕр ЕН» ентешлĕх ертӳçи,  пирен юратна палла юрас,   Андрей  Кузнецов, «Сĕнтĕр ЕН» ӗҫтешӗ, Сĕнтĕрпуҫ ял  тӑрӑхӗн  кураторӗ Н.Иванов,    районти шкулсен вĕрентекенĕсем тата ытти хăнасем çитрĕç.
 Шкулти вĕрентекенсемпе вĕренекенсем уява тĕплĕн хатĕрленни курӑнчӗ. Чи малтанах шкул ăш-чиккине илемлетнĕ, пĕтĕмпех чăвашла çырнă, "Тăван ялтан тĕнче уçлăхне" тата  вырӑнти художниксен куравне   хатĕрленĕ,  классенче  тӗрлӗ лапамсем ӗҫлерӗҁ.
        «Тӑван чěлхепе калаç» фестивале чаплӑн уçрӗҫ. "Эпир тĕнчешĕн чăвашсем пулнипе кăсăклă. Пирĕн чĕлхе интереслĕ, пирĕн чĕлхе пуян. Аттепе анне панă чĕлхене мĕнле-ха пĕтермелле? Чăвашлăх шăнăрĕ пирĕн çирĕп пулмалла",- палăртрĕ тăван чĕлхе фестивалĕнче Юрий Исаев министр.
"Республикăра кăрлачăн 1-мĕшĕ тĕлне миллион та икçĕр вăтăр пиллĕк пин те тăхăрçĕр тăхăрвун икĕ çын, пурĕ çĕр çирĕм сакăр наци çынни пурăнать. Вĕсенчен 67,7 проценчĕ чăвашсем! Эпир ытти халăхпа туслă пурăнатпăр", - аса илтерчĕ уява пухăннисене Лидия Филиппова.
Шупашкартан килнĕ хăнасем çакăн пек уяв йĕркелеме пултарнăшăн шкул директорне,  вӗрентекенсене, ачасене, кунти пуçлăхсене чунтан тав турĕç.
Район администрацийĕн пуçлăхĕ Анатолий Мясников хăй те чăвашла тăхăнса килни, шкул пурнăçне тĕплĕн пĕлсе, ăнланса тăни, таса чăвашла калаçни пурне те килĕшрĕ.
       Паллах, ăнланакансем пулсан, хавхалантарса пырсан, ĕçе тата та усăллăрах тăвас килет. Ку енĕпе шкула Сĕнтĕрвăрри район Пухăвĕн депутачĕ,"Сĕнтĕр Ен" ентешлĕх ертÿçи, паллă юрăç Андрей Кузнецов чылай пулăшса пырать. Вăл çине тăнипех ентешлĕх президиумĕн пайташĕсем те тăрăшуллă. Вĕсем парнелĕх фотоаппаратпа тĕслĕ принтер илсе килни шкул директорне Елизавета Матюшовăна тата кунти вĕрентекенсенпе шкул ачисене еплерех савăнтарчĕ.
       Фестиваль "çулçÿревĕ" чăнах та анлă пулчĕ. Вăл пурĕ вун виçĕ лапамра иртрĕ: «Сĕнтĕрпуç ял тăрăхĕ» , «Сĕнтĕрпуçěнчи пěтěмěшле  пěлӳ паракан шкул!», «Сĕнтĕрпуçěнчи тěп культура  çурчě»,«Йăва» ача ушкăнě, «Вырăнти усламçăсемпе фермерсем», «Кĕрешӳ», «Илемлěх тěнчи», «Тěрě тěнчи»,«Кил ăшши», «Халăх ăсталăхě», «Медиатекă», «Ăстаçă ачасем», «Вулавăш». Ҫак лапамсем шкул ачисемшĕн те, килнисемшĕн те чăваш чĕлхине мĕнле пĕлнине тата тавра курăма тĕрĕслемелли кăсăклă, лайăх мел пулчĕç.Фестиваль  вăхӑтěнче кунěпех « Чӑваш чěлхине лайӑх пěлетěп»  акци   иртрӗ. Акцие хутшӑнакансене  сертификат кěтрӗ. Кашни лапамрах пӗр ыйту çине хуравласа баллсем пухмалла пулна. Ҫавӑн пекех, «Эп -чӑваш. Чӑвашла шӑрçалла эп çыратӑп» акци  те иртрӗ.  Акцие хутшӑнакансене  каллех парне кӗтрӗ.
     Ачасем пурте уявра чăваш наци тумне тăхăнни, тăван чĕлхепе таса та тĕрĕс калаçни, хăнасемпе чăвашла тарават пулни пурне те савăнтарчĕ. Çапла, уявра кăна мар, кашни кун, пур çĕрте те çепĕç те илемлĕ чăваш чĕлхи янăраттăрччĕ! Атте- анне чĕлхине сума сăвасчӗ, ăна юратса вӗренесчӗ, упрасчӗ! Чӑваш чӗлхи! Ытла та эс илемлӗ! Чӑваш чӗлхи ҁӑл куҁ пек таса!

ФОТООТЧЕТ